سنه رابع طب أسنان (المستوى السابع) 🚩👩🏻‍⚕️.

"‏و تظن أنك لن تعبُر وتعبر، وتظن أن الكون و ما به ضدك فيسخر الله برحمته الأسباب لأجلك .. 

 فالحمدلله دائما ♥️".

اسعد الله أوقاتكم جميعاً بكل خير ، أتمنى تكونون بصحه وسلامه 💕. 

المدوّنه على وشك ان تكمل سنه من وقت إطلاقها ، أتمنى خلال هذه الفتره المنصرمه إني قدرت

 أفيدكم واقدم لكم تجارب قد لا تكون بالتجارب الممتازة لكنها جيّده بالكمّ الكافي لتفادي الوقوع في

 الأخطاء ولو بنسبه قليله ، والإلمام بالفكره الأساسيه لكل مستوى . 

أهدي هذه التدوينه ، لروح الراحله #جيهان_قاسم 

واسأل الله أن يجعلها في موازين حسناتها وحسناتنا جميعاً .. 

لا تنسوها من دعاءكم ❤️

تحتوي هذه التدوينه على ملخص للمستوى السابع تجربتي فيها وانطباعي وبعض النصائح التي

 أدليها لمن يحتاجها ، ووسيله أخرى لتوثيق هذا الشغف وتخليد للحضات الرائعه ! قد لا تكون متفاءله

 بقدر توقعاتكم ولا مُحبطه كما تخشونها لكني وبكل جهد واقصى احتراز للدقه 

حاولت جمع اكبر كم من المعلومات التي اتمنى ان تجدوا فيها الفائده .

بدايةً وقبل ما ابدأ حابّه انوّه على نقطتين مهمه: 

أولاً: وكعادتي ، أتمنى أن لا تأخذوا كلامي السلبي تجاه أي ماده او تجربه على محمل من الجد والتطبيق. كل شي كان مختلف بالنسبه لي وسيكون مختلف كذلك بالنسبه لكم. 

ثانياً: لاحظت تغيرات بسيطه حدثت في المستويات السابقه في بعض المواد او توزيع الدرجات أو طريقة الاختبارات ، لذلك وحرصاً مني على ان تكون هذه المدّونه سارية النفع وصالحه دائما للأخذ بها مع كافّة التغيرات ، فضلاً أي تغيير لاحظتوه في المستوى السابق أو ما سبقه وقد يُجدي نفعاً ويقدم فائده افيدوني به ليتم تحديث المدونه باستمرار ، وشكراً مُقدماً 💕. 

بسم الله نبدأ ، وأهلاً فيكم في سنه رابعه طب اسنان 👩🏻‍⚕️💕

ما الجديد في السنه الرابعه ؟ 

من ناحية المستوى السابع فالاختلاف على مستوى المواد بشكلها النظري لا يُعد كبير 

قد يكون الجديد في هذا المستوى  هو تعاملكم مع مرضى أكثر بالتالي مسؤوليتكم أصبحت اكبر 

المسؤوليه في كونك أنتي الطالبه المُطالبه بحضور المحاضرات النظريّه، 

وتطبيق ما درستيه بعد ساعه في المعمل على الدميه او بين ادوات معامل التركيبات وخليط المواد 

و في الوقت ذاته انتي الممرضه المسؤوله عن ترتيب العياده قبل وبعد ، تجهيز الادوات ، 

وانتي من جانب أهم الطبيبه المسؤوله كذلك عن مريضك بشكل كامل بدءاً بأخذ التاريخ المرضي

 مروراً بتطبيق العلاج بشكل صحيح خلال المواعيد ، وانتهاءً بكتابة الأدويه المناسبه للمريض

 وتنسيق موعد مقبل . 

المستوى السابع يحتوي على سبع مواد . ولأصدقكم القول ! لا يختلف كثيراً عن المستوى السادس 

من ناحية المواد النظريه ، بلّ اخف بكثيييير .. 

بالنسبه لي هذا الترم يُعتبر اخف ترم دراسي مررت به من ناحية الدراسه ، وأركز من ناحية الدراسه 

اما العملي والعيادات فالله به عليم (: 

نبدأ بالمواد التي تُعد إكمالاً للمستوى السادس : 

علم امراض الفم ٢ (Oral pathology): 

هذا الجزء من علم امراض الفم على شاكلة المستوى السادس ، بزيادة التعمق في المواضيع وتشعبها اكثر في علم الامراض ، 
راح تدرسون انواع الأورام والسرطانات الحميده والخبيثة والتصبغات الفمويه اللي تصيب منطقة الفم والاسنان .. 

هل سهل ؟  

بالنسبه لي اعتبره اثقل حبّتين من المستوى السابق بسبب تشابه اسماء الامراض وأشكالها واسبابها بشكل كبيرلكن

 مو مستعصي.. 

الكويز الاسبوعي بيساعدكم كثير تكونون مذاكرين أول بأول ، بالنسبه لي فيه محاضرات كنت اذاكرها

بشكل جيد في الكويزات وألقى نفسي في الميدتيرم او الفاينل لسى اتذكرها كويس😍!

الطريقه الثانيه اللي فادتني في علم الامراض هذا المستوى هو التلخيص ! كيف؟ 

كنت بعد تقريباً ثلاث او اربع محاضرات او حسب ما أكون فاضيه -وكل ما بديتوا اسرع كان افضل ،

 ممكن وقت ما تذاكرون الكويز تلخصون - ألخص المحاضرات .

مثلا محاضرة كانت تتحدث عن الأورام الحميده ، ابدأ باسم كل مرض / سببه او من وين ينشأ / شكله او اذا فيه

 شي مميز مثلاً ،والمعلومات الأساسيه بس بدون الشرح والتعمق  

اوقات كنت أضيف المعلومات الاساسيه عن الشكل المجهري للمرض وَذَا الشيء فادني جداً في اختبار العملي .. 

الطريقه مُجديه بشكل ما تتصورونه وتوفر وقت وجهد كبيروصدقوني لاحقاً بتشكرون أنفسكم ، 
ذاكروا ولما تخلصون مذاكره راجعوا من الملخصات اللي كتبتوها راح تلاقون انكم تقدرون تفرقون بين كل مرض والثاني ببساطه ، 
يجي وقت الفاينل ومعلوماتكم مرتبه وما تلخبطون وكل شي مكتوب بتفيدكم حتى في الاختبار العملي والشفوي !

مع كل الاسف عرفت الطريقه ذي وفائدتها اخر الترم ، بس شيء افضل من ولا شيء😂 

ممكن كذلك تتبعونها في محاضرات الامراض في التشخيص والاشعه والاشياء المتشابهه

 بشكل عام وبتدعون لي بإذن الله 👌🏻♥️..  

ومثل المستوى السادس ، محاضره وحده ومعمل واحد في الاسبوع | بمعدل ساعتين في الجدول (الخطه)

بالنسبه لتوزيع الدرجات 📍: 

-الكويز الاسبوعي من ٥ درجات أسبوعياً| ٥ درجات في المجموع 

-اختبار نصفي OSPE من ١٥ درجه 

*ومع الاسف هذا الشي ما كان في صالحنا أبداً ، الاختبار ما كان مُرضي المحاضرات كانت كثير + 

تشابه الأسماء والاشكال + ماكان عندنا وقت كفايه للمذاكره فالدرجات بالمقابل كانت سيئه 🙆🏻‍♀️! *

كنت اتمنى يكون ١٠ درجات OSPE و٥ درجات اختبار شفوي صحيح الشفوي مو الأفضل لكن كان

 ممكن نجمع كم درجه من الشفوي و -الستر طيب -😂!

اتمنى يتعدل لكم الوضع ، ولو ما تعدل لا ترتكبون نفس خطأنا وتذاكرون بوقت متأخر ، ابدأوا بدري ولا 

تتساهلون فيه لأن عليه نفس مقدار الدرجات على الاختبار النصفي النظري والتشابهه في صور الامراض

 والعيّنات المجهريه كبير جداً جداً

-١٠ درجات على العرض او البرزنتيشن (العرض بعد ما تعرضونه ممكن الدكاتره ينبهونكم على كم نقطه

تعدلونها على العرض او أضافه معينه ، عدلوا قبل لا ترسلون هذا التنبيه رحمه من ربي صدقوني!) 

-١٥ درجه اختبار نظري نصفي (الميد تيرم) 

-٥ درجات على المانوال وحضور المعمل  

ممكن يكون فيه تغيير في طريقة توزيع الدرجات كل ترم ، بس دائماً يكون التوزيع قريب من اللي ذكرته 🌟. 

بالنسبه للفاينل : 

اختبار الـOSPE كان اسهل وأجمل بكثييييير من النصفي والحمدلله 😍😂! 

صدقوني مذاكرتكم أول بأول في الكويزات ، ولما تشوفون الـcase scenario في المعمل وتركزون فيه بيساعدكم هذا الشيء في إنكم تفرقون وتتذكرون بينها بسهوله باذن الله 👌🏻. 

الشفوي كان مقدور عليه ،على الرغم من حالة التوتر الجماعيه اللي تصيب كل الدفعه لما نسمع 

"Oral viva exam” 😂💔! 

كل ما اتذكر الاحساس يجيني احساس فراشات في بطني🌚💔! 

وما أشعربالأسف طبعاً ولا اقول اني ما توتّرت ، لكن دائماً حاولو تسيطرون على أنفسكم في مثل هذا

 الحالات وتذكروا انتو ذاكرتوا وبذلتو جهد كبير وإحساس التوتر بيضيع كل شي حرفياً بلحظه ! 

اذكر اني في وسط أسئلة الدكاتره ، ناقشت الدكتور في علامة الـ Leontiasis ossea 

وايش الامراض الثانيه اللي ممكن تسبب هذه العلامه ! خلق جو شوي وحسيت اني نسيت وضعي وكأني

 مو في اختبار وخفّ التوتر كثييييير والله 😂! 

كل ما تحتاجونه هو الثقه دائماً ♥️. 

الاختبار النهائي النظري كان زكاة كل الأختبارات الحلوه اللي مرّت في حياتي الجامعيه ،

 وطبعاً لا أُعزي هذا الشيء ان الماده مستعصية ، لكنها صعبه وتحتاج جهد .  

وانتو قدها وتقدرون تهزمون  علم الامراض بجداره💪🏻♥️. 

تشخيص امراض الفم ٢ (Oral Diagnosis): 

مادتي المُفضّله دائماً ♥️♥️♥️. 

ايش الجديد في المستوى السابع ؟ راح يكون أغلب تطرقكم في المواضيع إلى امراض الـجذور 

والانسجه الحول سنيه (Pre apical Desase ) 

راح تدرسونها بالتفصيل من نواحي عدّه، وكيف تفرقون بين كل مرض والثاني من خلال التاريخ المرضي ، 

نوع الألم وصورة الأشعه .. 

بالنسبه لي ، حضوري للمحاضرات أول الترم ساعدني مره أتذكر المعلومات وشكل ونوع كل مرض في العياده مع المرضى ، 
محاضرات الأسابيع الاولى بتفيدكم  وقت التشخيص وغالباً اذا فهمتوا وقدرتوا تفرقون بينها بتجيبون التشخيص الصح من أول مره😍! 

وزي المستوى السادس ، المرضى يجونكم من الاستقبال ،تاخذون التاريخ المرضي

بعدها الفحص ثم الاشعه وتحددون المرض وخطة العلاج ، وطبعاً بمساعدة الدكاتره ✔️. 

حلو مع التشخيص اذا عرفتوا مشاكل المريضه وحددتوا خطة العلاج ، تشوفون اذا من ضمنها خلع

 أو تركيبات كامله او جزئيه تصيرون تحولون المرضى لكم في عيادات الخلع أو عيادات التركيبات
 ، وكذا تكونون بنيتوا ثقه اكبر مع المرضى ، واستفدتوا من الجهتين 💪🏻. 

بالاضافه إلى الـ (manual book) 

تكتبون فيه لكل مريض المطلوب منكم هذا الترم ٥ حالات مرضى تشخيص زي المستوى السابق 

العيادات دائماً خفيفه بالنسبه لي وكنت استمتع فيها بشكل كبير ، احرصوا تدونون مع الدكاتره المعلومات البسيطه اللي ممكن

يقولونها لكم وسط شرح حاله مرضيه معينه كل دكتور اسلوبه يختلف وممكن يعطيكم معلومات مميزه وغير قابله للنسيان .

اختبار العملي النصفي : 

كان العملي على مرضى على خلاف المستوى السابق ، مجموعات كل مجموعه تمسك مريضه 

جديده تاخذون التاريخ المرضي ،تشخصون ، تاخذون اشعه ، تفحصون الاشعه تحددون التشخيص

الأخير وأخيراً تكتبون خطة العلاج . 

ما كان صعب الحمدلله وكل شي مرّ بسهوله ، والدكاتره كانو متعاونين معنا انتبهوا لبعض الخطوات البسيطه

اللي ممكن تنسون منها مثلاً إحنا نسينا نفحص الـperiodental pocket  
مع انها أهم خطوه لأمراض اللثه ومع الاسف طلع التشخيص كله خطأ بسبب هذا الشي البسيط ): 

بس الدكتور كان جداً متعاون معنا وخلانا نفحص من جديد ونشخص مره ثانيه😂💪🏻! 

راح تقرأون الاشعه مع الدكاتره ، ويسألونكم عن بعض الاشياء اللي راح تظهر في الصوره ، 

وبرضو سهل ♥️. 

الاختبار كان من ١٥ درجه 

والميد النظري كان كذلك من١٥ درجه ، كان بالنسبه لي حلو على الرغم انها جت بعض الاسئله

 من محاضرات الـPDF (: 

بالنسبه للفاينل : 

(مافيه عيادات😍) 

فقط بيكون فيه اختبار OSPE  واختبار شفوي 

اختبار الـOSPE بين كل فتره وفتره بيكون فيه وحده من المحاضرات تدريب على الاوسبي ، كيف؟ 

يعطيكم الدكتور محاضره فيها شرح لأمراض وحالات معينه مع الصور او الاشعه، وتكون عليها اسئله مثلاً: اسم المرض ، 
الـdifferential diagnosis لهذا المرض ، ايش سببه مثلاً او ممكن يكون مرتبط مع متلازمة معينه او مرض 

جهازي آخر .. 

الاوسبي مهم تكونون حاضرين فيه صدق ، لأنكم بتعرفون من خلال المحاضرات طريقة الاختبار

 وكيف تجي الاسئله وكيف تفرقون بين الامراض ، مو بس للاختبار لا حتى مستقبلاً في كل العيادات .. 

ولأن التشخيص أهم ماده أساسيه لازم نتعلمها ، خلوكم مُجدّين فيها ، كل المواد او بالأحرى كل 

العيادات تشخيص ، خلع ، تركيبات ، وحتى قراءتكم الاشعه في مادة الراديولجي بتعتمد على

 فهمكم لمادة التشخيص ! 

الاختبار الفاينل الثاني كان شفوي ، من ١٠ درجات 

كان لطيف وخفيف ويسير 💕. 

الفاينل النظري من ٢٠ درجه ، بالنسبه لنا ما كانت كافيه المحاضرات وفيه اسئله كثير جت من 

محاضرات الـPDF ، تقدرون تقرأونها بتمعُن بعد مذاكرة كل محاضره وبكذا تكونون ألميتوا بكل

 شيء وضمنتوا بإذن الله درجات اكثر ♥️. 

إكلينيكية الاستعاضه المتحركه ( Clinical Removable prosthesis) :

المقرر لا يختلف عن سابقه و يُعد إكمالًا مع بعض التعمق في ذات مواضيع السنة الثالثة ، صناعة 

أطقم متحركه كامله وجزئيه بنفس الخطوات والتسلسل ولكن هذه المره في فم المريض 👩🏻‍⚕️! 

الجزء النظري : 

أنا اشوف ان الجزء النظري ما يختلف كثير عن المستويات السابقه ، ويعتمد بشكل كبير على مدى استيعابكم

 لها سابقاً واسترجاعكم للمعلومات 

المحاضرات سهله وخفيفه ، ممكن يكون فيه شوي معلومات جديده تخص العيادات وطريقة التعامل مع المريض ،

 انواع المرضى وبعض الحالات المرضيه اللي ممكن تقابلكم  

جزء العملي او العيادات يعتمد على إيجاد المريض المناسب .. 

العيادات 🚩: 

أول الترم يتم تقسيمكم مجموعات ممكن على اربع طالبات او ثنتين ، على حسب الحاله 

وطبعاً الحاله او المرضى ما راح يجونكم على طبق من ذهب ! 

ابحثوا وأُشيد عليكم بالبحث من بدري لا تتهاونون لوقت ما ينتصف الترم ، ويصير عدد الأسابيع

عندكم قليل مقارنه بعدد المواعيد اللي تحتاجونها لإكمال العلاج  ابحثوا في عيادات الجراحه عند المرضى حديثي الخلع ، 
عند عيادات التشخيص،  استعينوا بأهلكم جداتكم مثلاً لو عندهم أصدقاء او أي احد يحتاج تركيبات 

تجديد طقم قديم لأن وببساطه مع الوقت يصبح أقل فعاليه وراحه للمريض
 عندنا مميزات أكثر ، شغلنا سريع ومجاناً ..... ألخ 

 استخدموا كل طرق الجذب الممكنه ، المهم ابحثوا! 

شغل العيادات ما يختلف عن شغل المعمل وسواءً كانت المريضه حالة CD او RPD 

ضعوا بعين الاعتبار ، المستوى السابع مريض CD اذاً المستوى الثامن RPD والعكس صحيح ..

كل الخطوات اللي سويناها بنرجع نسويها بس على مريض حقيقي ، باستثناء طبعاً شغل المعمل 

بعد ما يكون عندكم حاله ، وعلى حسب الحاله بيكون عدد الطالبات اللي يمسكونها تبدأون خطة 

العلاج 

اذا سارت الأمور بالشكل الصحيح ، وما حصل تأخير او مشاكل اخرى .. راح ياخذ الشغل تقريباً

 من ٦ إلى ٧ اسابيع 

الموعد الاول للمريضه يكون اخذ التاريخ المرضي — تشخيص كامل الفم—

تشخيص المشكله اللي تعاني منها المريضه — اخذ اشعه — مناقشة الحاله مع الدكتوره ومن ثَم تضعون خطة العلاج .

لو حالفكم الحظ وأسعفكم الوقت تقدرون تاخذون في الموعد الاول الطبعه الاولى او (primery impression ) 

نصائح العيادات الذهبيه 🌟: 

١/ مهم اذا كانت المريضه تحتاج RPD او طقم جزئي وحددتوا المشكله وخطة العلاج ،

 من الموعد الاول يتم إعلام المريضه بخطة العلاج 

 متضمنة شكل التركيبه او الاستعاضه اللي بتحصل عليها ، وانها بتكون من معدن مثلاً او أكلريك وشكلها بيكون كذا حتى تعرفون موقفها من شكلها البعض ممكن ما يسأل ولما تنتصفون في

 العلاج تتفاجون برفض المريضه لشكل التركيبه ! وبالتالي كل شي راح

٢/من النادر جداً تجي مريضه تحتاج تركيبة RPD وتكون اسنانها المجاوره سليمه بشكل تام ! 

قد تحتاج بعض التعديل / خلع /حشو / تركيب استعاضه ثابته والكثير ... 

في اول موعد وبعد ما تاخذون الطبعه الاولى وتحددون باقي مشاكل الاسنان من التشخيص 

والاشعه هنا تبدأ فقرة تحويل المريضه للأقسام الثانيه لاستكمال خطتها العلاجية / حشو /عَصب... ألخ 

نصيحتي ✨ :

عادةً تكتبون ورقة تحويل بإسم المريضه ومشكلتها ومكان السن للقسم المناسب وتضعونها في الملف 

 طيب وبعدها ؟

 تنتظرون احد مّا يمسك الملف و يجي الفرج وهنا تبدأ مرحلة كل يوم أسأل المريضه ايش سوت ؟ 

هل كملت باقي علاج الاسنان الاخرى ولا لا ؟ وهذا الشي يسبب قلق كثير وممكن 

حتى ما احد يمسك حالتها .. 

ايش الحل ؟ اذا عرفتوا المشكله اكتبوا ورقة التحويل مافيه خلاف على هذا الشيء لأنها ضروريه ،

بعدها تواصلوا مع أي طالبه من المستوى المطلوب للعلاج 

ممكن الليدر تكلم ليدر المستوى الفلاني وهكذا ، او طالبات الامتياز او تستعيون بالدكاتره لمساعدتكم ، مثلاً تحتاج استعاضه ثابته (تلبيسه) تتحول على مستوى عاشر وبكذا تكونين عارفه 

مين مسك حالة مريضتك ،وتكونين متواصله معها أول بأول حتى ما تتأخرين في مواعيدك وخطة 

العلاج ... 

ومع الاسف استوعبت هذا الشيء متأخر وعلى الرغم اني كنت ماسكه حاله لكن تعثرت في باقي 

المواعيد كثير وخلص الترم وما خلصنا خطة العلاج 💔.

٣/ تجهيزكم للموعد من قبل بيوم افضل بكثير ، مهم تقرأون عن الخطوات اللي تسوونها مع المريض في كل موعد

 عشان ما تستهلكون وقت وانتو تجهزون وتسترجعون المعلومات 

بيانات المريض تكون متواجده معكم دائماً تحسباً (صور الاشعه، رقم الجوال ، رقم الملف ...الخ)

لان ممكن تحتاجونها في اي وقت بحكم أن المريض بيكون معكم فتره طويله .. 

٤/ التقييم في العيادات بيكون أسبوعياً ، وسواءً كنتي ماسكه حالة مريضه او شغلك على الڤانتوم 

بيكون التقييم للكل ، بيكون فيه على البلاك بورد  Manual Guide  لكل خطوات معالجة المريض 

من الألف إلى الياء 

مفيد جداً جداً ممكن تحملونه على الجوال ويكون معكم دايماً او نسخه ورقيه منه ، فيه كل المعلومات

 اللي تحتاجون ترجعون لها وتساعدكم في الاجابه على الاسئله المُباغته (: 

وفِي أغلب الاوقات كانت اغلب مذاكرتنا للتقييمات منه .. 

٥/ أهم نقطه بتسوينها هي كيف تاخذون طبعه او (impression )  

بشكل صحيح وكيف يكون الخليط بقوام مناسب تدربوا مره ومرتين وثلاث ومليون مره ! 

انا مع العلم اني من المستوى الخامس وانا أتدرب على استخدام الاليجنيت الا أنني ولله الحمد ولا 

مره ضبطته (: 

تدربوا على أخذ الطبعه لمرضى الـRPD ممكن تستعينون بأصدقاءكم

تدربوا كذلك على الطبعه الثانويه ، وكيف تسوون الـ(special try) 

في المعمل تدربوا وجربوا اكثر من ماده لو سمحت لكم الفرصه لأنكم ما تضمنون تواجد نفس المواد دايماً ! 

٥/ تقييماتكم أول بأول يا بنات ، لا تراكمون شي او على الاقل حاولو تنهونها بدري ، يجي اخر

 اسبوع في آخرعياده تتفآجون لسى فيه تقييم او اثنين ما انتهيتوا منها 💔

واذا ما لقينا حالات ايش الحل ؟ 

احب انوّه ان الدكاتره من ذي الناحيه جداً متعاونين وعارفين بقلة الحالات مقارنه بعددنا، 

تقدرون تشتغلون وتطبقون كل الخطوات من الألف إلى الياء 

على الڤانتوم(الدميه) وما راح يكون بينكم وبين اللي ماسكين حالات اي فرق ،

 لكن هذا ما يعني إنكم تتكاسلون عن البحث ابحثوا حتى لو في نص الترم لو وافقوا الدكاتره

ومافيه اي معوقات ممكن تسبب تأخير والحاله سهله ابدأو الشغل ✨. 

الدرجات ❇️: 

-تقريباً مجموع التقييمات على ٣٠ درجه 

-الاختبار النظري النصفي من ١٠ درجات 

-و١٠ درجات (اعتقد) على واجب او واجبين 

الاختبار النهائي مقسم على ثلاث أقسام : 

الأول : اختبار عملي على طريقة اخذ الـimpression للفكين العلوي والسفلي ،

ممكن على الڤانتوم وممكن على مريض متطوع – وطبعاً انتو محظوظين لو حصلتوا على

متطوع للامبرشن الساعه 9 صباحاُ- من (٣٠ درجه)  

الثاني : اختبار شفوي من ١٠ درجات 

الثالث : الاختبار النظري من ١٠ درجات 

الماده هذا الترم شغلها كثير يحتاج تركيز وتدريب ومهاره ، وحتى لو ما لقيتو مرضى تدربوا

 على أهم الخطوات الاساسيه واسألوا وناقشوا الدكاتره واستفيدوا من كل لحظه في العيادات ،

الايام الجايه يكون عندكم مرضى ولازم تكونون بمهاره وحرفيه عاليه🌟♥️

نبذه عن حوسة هذا المستوى : 

أفضِّل عيادات البرسثو على باقي العيادات في هذا المستوى ، يمكن عشان المرضى كبار السن ♥️! 

 والدعوات اللي يغرقونا فيها كل مره .

 على الرغم من ان الشغل متعب أحياناً لكن الدعوات والشكر في كل مره تزيل كل التعب ♥️♥️♥️! 

أشعة الوجه والفكين 2 ( Oral & Maxillofacial Radiology ) :

المقرر  في هذا الترم اسهل بكثير من المستوى السادس وأخف 😍

المعلومات صارت اقل تشعباً من اول ، وكمية المعلومات الفيزيائية اختفت مقارنه بالمستوى السابق 

ايش الجديد في مقرر الاشعه هذا المستوى ؟ 

راح تدرسون الاشعه البانوراميه، اشعة الرأس من انعكاسات مختلفه وطريقة تشخيص الامراض 

من صور الاشعه . 

الصدق كان ممتع اكثر من المستوى السابق ، المعلومات اخف واكثر قابليه للفهم بشكل سريع ، 

شرح الدكتور محمد اجمل اكثر شي ساعدنا الترم ذا نتذكر ونفهم من اول مره ، حرفياً من اول مره !

مستحيل تطلعون من محاضراته ولو على الاقل ما علقت في اذهانكم لو معلومه وحده ! 

بالنسبه للعملي خفيف ولطيف وممتع ، راح يكون اول الترم تعلم على طريقة رسم اشعه بانوراميه 

بكل العلامات والأجزاء اللي تشوفونها  

بعد ذلك تبدأون تتعلمون طريقة اخذ اشعه بانوراميه، والاجراءات اللازم اتباعها وطريقة قراءتها ..

وبنفس الطريقه تدرسون الطريقه في اسبوع والأسبوع التالي تطبقونها وتتقيمون على التطبيق 

جزء النظري : 

المحاضرات تتكلم عن الاشعه البانوراميه في أكثرها وايش الامراض اللي يتم تشخيصها من الاشعه 

البانوراميه وكيف تفرقون بين كل مرض والثاني من ناحية شكله اختلاف ألوانه الأُحاديه من الابيض إلى الاسود حدوده ....

قيّم جداً هذا المقرر ومُفيد واعتبر انه لُب طب الأسنان ، وتعتمد عليه كل فروع طب الاسنان الاخرى،

 طالما عرفتي تقرأين الاشعه بشكل صحيح بالتالي تشخيص صحيح وخطة علاج متكاملة ..

الدرجات💡 : 

تقريباً فيه ١٠ درجات على التقييمات العمليه ( كل اسبوعين تقريباً )

اختبار نصفي من ١٥ درجه 

٥ درجات بروفشناليزم المعمل 

وفيه في وسط الترم اختبار شفوي من ٥ درجات 

مع سمينار او عرض تقدمونه وتناقشونه مع الدكاتره من ١٠ درجات 

واجب من ٥ درجات 

وفي وسط الترم راح يكون فيه اختبار تحت مُسمى الـcompetency 

ايش يعني ؟ هذا اختبار بدون درجات وغالباً يكون شغل / تطبيق/ حالات /

 وهو اللي يقرر اجتيازك لمقرر مَّا بناءً على شغلك وإتقانك للمهاره ،

 ومن الان فصاعداً راح تكون اغلب المواد كذلك 

بمعنى، اجتيازك لهذا الاختبار ، يقرر اجتيازك للمقرر حتى لو مجموعكA+ 

حالياً مافيه شي يخوف لا تخافون ، بس حبيت اطّلعكم على هذه المعلومه المهمه 🌟

وبطريقة اخرى ، مافيه احد ما يجتاز كومبتنسي الاشعه (: 

راح يكون فيه اشعه تشوفونها والدكتور يسألكم هذا الجزء ايش ؟ او هذا العلامه تدل على ايش ؟ 

وانتو تجاوبون 

-وترررررا خلص الاختبار 💃🏻-

سهل وما يخوف ويساعدون كثيييير حتى لو نسيتوا المعلومات 

بالنسبه للسمينار :  

هو عرض تسوونه كمجموعه عن موضوع معين في الماده وتناقشونه مع الدكاتره ويسألونكم عنه 

الاختبار العملي النهائي كان عباره عن OSPE 

وصور لأشعه مختلفه كل صوره راح يكون فيها مطلوب عدد اشياء معينه يتم ذكرها 

مثلا تشخصون مرض ، تذكرون عدد الاسنان ، تستنتجون مرض معين من الصوره وهكذا ، 

سهل سهل سهل بشكل ما تتصورونه ، وراح تتدربون كثير على الاختبار قبل بوقت وبالتالي

بتصيرون مُتمرسين في قراءة الاشعه 🙏🏻. 

النظري كان جيّد الى حدٍ ما ، وكان فيه اسئله من الـPDF 

ممكن تلجأون لطريقة انكم بعد كل محاضره تذاكرونها PPT تذاكرون PDF 

او ممكن تتعاونون وتلخصون المحاضرات قبل وقت الاختبارات وتجمعون المعلومات في سلايدات من كِلا المصدرين 

كل الطرق فعّاله ، وعموماً حتى محاضرات الـPDF اخف بكثير من محاضرات المستوى السابق 

نصيحتي لكم من قلب قلبي لهذا المقرر ،

ذاكروا زين ، افهموا زين وطبقوا، اسألوا الدكاتره عمّا قد يُشكل عليكم ودّونوا اول بأول معهم من الان فصاعداً انتو اللي بتاخذون الاشعه لمرضاكم، 
وانتو اللي بتقرأون  الاشعه وتحددون كل شي من خلالها 👌🏻🌟. 

الانعاش القلبي الرئوي / الانعاش الدوري التنفسي او الـ (CPR) 🚨: 

الماده ببساطه تتحدث عن الحالات الطارئة اللي ممكن تواجهنا في حياتنا أو ممكن حتى نشوف 

البعض منها في العياده مع المرضى .. 

بدأً بالحروق والجروح والحوادث مروراً بالتعامل مع حالات الإغماء والاختناق انتهاءً بطريقة 

الإسعاف او الانعاش القلبي الرئوي . 

بالنسبه لي اشوفها من أكثر المواد قيمه لنا كممارسين صحيين ومدى أهمية إلمامنا بطرق الإسعاف لأكثر 

الحالات اللي ممكن نشوفها في حياتنا اليوميه . 

كماده دراسيه كانت بمعدل ساعه وحده أسبوعياً = ساعه وحده ف المعدل 

والغياب جداً قليل فيها 🌟

الدرجات توزعت بين اختبار نصفي (ميد تيرم ) 

من ٢٥ درجه 

والـ٢٥ درجه المُتبقيه كانت موزعه على واجبين  

——— 

والـ٥٠ درجه النهائية على الاختبار النهائي النظري 

بالنسبه للمحاضرات ، تتفاوت مستوياتها بين الصعب والمتوسط راح يكون على الليدر انها تاخذ 

المحاضره من الدكتور اللي بيشرح لكم أسبوعياً لانها ما تنزل على البلاك بورد وطبعاً لان كل

 محاضره دكتور مختلف 

الاختبارات مستواها تفاوت بين الجيّد الى المقبول بس الماده بصدق كانت سهله يعني تقدرون

 تضمنون فيها درجات عاليه ، التجميعات ساعدتنا كثييييير لو على الاقل نعرف طريقة الاسئله على بعض الاشياء 

استعينوا باليوتيوب او بالـslide share  

اذا ما فهمتوا موضوع معين او للاستزادة وباذن الله يكون سهل 🌟✅

مقدمه في الاستعاضه الثابته : (introduction to fixed prosthesis): 

الماده تتحدث عن فرع مهم في الاستعاضات او التركيبات بشكل عام وهو الاستعاضه الثابته وفيها مقدمه إلى انواع التركيبات الثابته ، الجسور، العدسات او المعروفة بـHollywood smile و مكوناتها وخطوات إعدادها والتقنيات المستخدمه فيها 

على مدى محاضره نظري ومعملين | ساعتين في المعدل 

المعمل ممتع وما يختلف عن الاوبريتف الشي الجديد هو استخدامكم لأدوات طرق وتقنيات جديده للحفر على سطح السن الخارجي والمحافظه عليه باقصى قوه مُمكنه

لذلك بتكونون متمرسين أكثر والتدريب ما بياخذ وقت كثير الى أن تتقنوا 💪🏻

-الحقيقه اني لما شفت شغل اول معمل ، وقارنته بآخر الترم استحيت على وجهي - 

النظري | المحاضرات سهله وخفيفه صحيح المعلومات الجديده كثيره

 لكن ليست بذلك المستوى من الصعوبه 

توزيع الدرجات : 

- ٢٥ درجه تقييمات اسبوعيه تقريباً  و الـprofessionalism 

-٥ درجات واجب اول الترم 

- ١٠ اختبار نظري 

- ١٠ اختبار عملي نصفي osbe

العملي| بعطيكم نصيحتين من قلبي 💕

الاولى : وقت شرح الدكتور لطريقة الحفر دّونوا معاه القياسات او المعلومات المهمه اللي بيقولها مثلا نوع الـbur

 المستخدم الزوايا اسماء الأسطح الخارجيه التكنيك الصحيح ...الخ 

بتفيدكم في شييئين ، الاول وقت الشغل تطبقون صح ما يحتاج تجلسون تسألون او تدورون في قوقل 

اوتبحثون ف المحاضره بالتالي توفير وقت اكثر ✅

الشي الثاني ، ممكن يجي سؤال مباغت وقت التقييم من هنا او هناك عن ذي المعلومات الاساسيه واللي لازم تكونون عارفينها تحسباً لكل نوع 

الثانيه : ذاكروا تقييماتكم من بدري ، اقصد قبل المعمل او مثلا اليوم اللي قبل يجي يوم التقييم تسلمون 

الشغل و تتقيمون وانتو مذاكرين ومخلصين وترتاحون من المذاكره وسط الضوضاء

 وصوت الـ Handpiece -وتطلعون بدري طبعاً-

بالنسبه للفاينل : 

 فيه اختبار عملي ينقسم على جزئين جزء تسوون فيه حفر بشكل معين على سن 

والثاني تسوون فيه طبعه او (impression) خاص بالتلبيسات او الاستعاضه الثابته 

النظري كان من ١٠ درجات بس ، وكان ثالث افضل اختبار اختبرته ،

 بعد اختبار البرفنتف في المستوى ٦ طبعا 😍😂❤️

وبما انها ماده تأسيسية ساعدوا انفسكم تبدأون فيها صح ،واضمنوا درجات كويسه 🌟

جراحة الفم والممارسة العامه (Oral Surgery ) :

مادتي المُفضّله الازليه ، واللي سببت لي قلق كثير بالمقابل ، واللي كنت ادخل العياده وانا أردد

 "ربّي أدخلني مُدخل صدقٍ وأخرجني مُخرج صدق واجعل لي من لَّدُنك سلطاناً نصيراً " 

الماده تتكلم عن الجراحه كما السابق لكن بشكل أعمق، بتدرسون في الجزء النظري الخلع الجراحي وأساليبه وطرقه ، وكسور الوجه والفكين وانواع 

الالتهابات والامراض اللي تصيب منطقة الوجه والفكين 

الجزء النظري حقيقه كبير ودسم دسم جداً ولا يُقارن بالمستوى السادس ، الماده بمعدل ٤ ساعات أسبوعياً = ٤ ساعات في المعدل وبكذا تكون اكثر ماده عدد ساعات

 هذا الترم 

المحاضرات اغلبها طويله لكن كافيه بشكل كبير من ناحية المذاكره ، المعلومات كثير

 والمصطلحات الجديده كذلك،  وبالتالي ذاكرو اول بأول لو كنتوا تبغون درجات كويسه في

الاختبار النصفي .

اختبار نصف الترم كان كويس بالنسبه لي على الرغم من عدد المحاضرات الكبير لكن اجتزناه 

الحمدلله 

وكان من ١٥ درجه 

٥ درجات مقسمه على واجبين 

و٥ درجات اختبار OSPE 

وباقي الدرجات على العيادات والتقييم 

مرجعنا الوحيد في الواجبات ولو كنتو تبغون زيادة معلومات (‏contemporary) 

وتقريباً هذا أشهر المراجع في الجراحه .

العيادات 🚩:  

راح تطبقون فيها الخلع البسيط والتخدير الجزئي مثل المستوى السادس ،

 بس طبعاً الوضع أصبح ( Requirements ) 

المتطلبات ما اذكر كانت محدده ، وممكن تختلف من دفعه لأخرى بس اذكر في اول الترم كان مطلوب ٥ حالات او ٤ وطبعاً مع الوقت تقلصت 

بسبب قلة الحالات مقارنه بعددنا .. 

ايش يصير في كل موعد ؟ 

بعد اخذ موافقة الدكتور على الحاله ، بدايةً تاخذون التاريخ المرضي كامل —

تفحصون المريض فحص كلي وفحص مخصص لمنطقة الخلع —

ومن ثمّ تقدمون الحاله للطبيب المسؤول عنكم وتآخذون الموافقه ببدء العمليه ،

وبعدها تاخذون موافقة المريض (وانتبهوا لا تنسون موافقة المريض )

بعدها تبدأون تعطون المريض حقنة التخدير — تتأكدون من فعالية التخدير —

تبدأون عملية الخلع — تنهون العمليه وتعطون المريض الادويه المناسبه مع تعليمات ما بعد الخلع

— ترتبون وتنظفون العياده طبعاً — وأخيراً تدونون كل اللي سويتوه في ملف المريضه 

قد تكون الخطوات معروفه للبعض ، وقد تكون جديده لمن لم يكن لهم تجربه سابقه .. 

أعتقد قلوبكم صارت قويه (: 

أولاً : اول الترم حاولوا تراجعون طرق التخدير لكل جزء في الفم طبقوا على بعض في اوقات فراغكم في العيادات

 ولما ما يكون عندكم مرضى .. انصحكم كثير وكثير جداً بمرجع

 handbook of local Anesthesia / Stanley f. Malamed

راح يسوي مراجعه لمعلوماتكم بشكل كبير خصوصاً انه سهل اللغه وبسيط وشامل ويحتوي

 على صور كثير بتسهل عليكم تذكر المعلومات والـland marks

ثانياً : بيطالبكم منسق الماده بتعيين طالبه منكم مسؤوله عن توزيع المرضى عليكم ،

 بتكون عندها قائمه أسبوعياً بمرضى يحتاجون خلع وتكون مسؤوليتها توزيع المرضى

 عليكم حسب قائمة اسماءكم 

-ابحثوا عن مرضى ولا تعتمدون على القائمه اللي تجي أسبوعياً لانها ما تكون كافيه على عدد الدفعه ،

وممكن تكون قديمه او تتشاركونها مع بنات المستويات الثانيه واحرصوا في حال وجدتوا مرضى بطريقتكم

ان يتم إعلام المسؤوله عن توزيع المرضى عليكم ، عشان تعيد توزيع الحالات على الطالبات اللي ما عندهم وهكذا ... 

ثالثاً: في حال كانت عندكم حاله مضمونه ،جهزوا كل شي من بدري اقرأوا ملف المريضه جيّداً 

/ اطّلعوا على الاشعه / ناقشوا الحاله مع دكاترتكم لو كنتو تحتاجون استشاره قبل الموعد /

رتبوا الخطوات بشكل جيّد في ذهنكم او دوّنوها .

رابعاً: دائماً دائماً جيبوا معكم سناك خفيف للمرضى اللي ممكن يجون بدون اكل بالتالي ممكن

 يتعبون وقت الخلع او التخدير وضروري تسألوهم قبل البدء بأي إجراء ما اذا أكلوا قبل الموعد أو لا . 

خامساً : جهزوا العياده وكل الادوات قبل ما تستدعون المريضه ،بحيث ما تطلعون ابداً لما تلبسون ،

 وبكذا يكون أريح وأنظف .

سادساً : كل وحده بيكون معها طبيبه مساعده (assistant) وتحسب حالة طبيبه مساعده يعني لو كانت المتطلبات ٥ حالات خلع مثلاً بالتالي لازم يكون فيه 

٥ حالات طبيبه مساعده او (assistant ) 

سابعاً:  اهم شي وممكن كثير منكم ينساه ، لو المريضه كبيرة سن وحتى لو ما كانت تعاني من

 اي مرض ضروري تقيمون ضغطها والسكر قبل البدء بأي اجراء  

ثامناً : لا تنسون تعطون المريضه تعليمات ما بعد الخلع بشكل مـفصل ،الادويه المناسبه للحاله مثلا ممكن تحتاج مضاد حيوي مع المسكن ، ووصف طريقة اخذ الدواء للمريضه بالتفصيل كذلك 

تاسعاً : قد لا يُحالفكم الحظ بوجود حالات سهله ومتطلبات بسيطه (الخلع البسيط) 

وطبعاً بسبب قلة الحالات كنّا مُجبرين على خلع جذور الاسنان المتبقيه او ما يسمى بالـRemaining Root

وعلى الرغم انها ما تُقارِن بحالات الخلع البسيط المتطلبه لنا الا اننا قدرنا نخلع ونجتازها بسهوله !

 لذلك لو لقيتوا حالات كذا خذوها ولا تخافون او تترددون ، وثقوا في انفسكم وقدراتكم♥️ 

اخيراً: تعاونوا تعاونوا تعاونوا واتركوا عنكم الانانيه ، لو سمحت لكم الفرصه تشاركون مرضاكم 

شاركوهم مع صديقاتكم وباقي بنات الدفعه ، في حالة المريضه كان عندها سنين تحتاج خلع

وكل سن بيكون بتخدير منفصل (مثلاً يكون سن في الفك العلوي والآخر في السفلي )

 شاركي السن الثاني مع صديقتك في نفس الموعد ، وكذا تكونون خخفتوا على المريضه ألم ومواعيد اخرى وتعاونتوا ! 

كون مثلا انك خلعتي اكثر من سن في ربع واحد (quadrant ) ممكن تحسب حاله وحده

وممكن تحسب حالتين لو كانت الاسنان ثلاثه مثلاً ، وطبعاً لو المريضه تحتاج خلع اكثر من سن في ربع واحد

 فهذا يتم في موعد واحد وإبرة تخدير وحده ، وممكن كمان تتشاركون المريضه

وكل طالبه تخلع سن بعد موافقة الدكتور وهذا افضل 🌟

حاولوا ما يكون بينكم تفاوت كبير في عدد الحالات ، مثلاً لو خلعتي خلال شهر حالتين

 وحصلتي على مريضه تقدرين تعطين الطالبات اللي الى الان ما حصلوا على اي حاله ،

وبكذا يكون معدل الحالات بينكم متقارب والدكاتره بيساعدونكم اكثر ،

لان لو كان فيه فارق كبير راح تكون المسؤوليه والحمل الأكبر على الطالبه اللي إلى الان ما خلعت

 ولا حاله وطبعاً الدكاتره بيصفونها بالمهمله !

 لذلك تعاونوا المريض اللي بتشاركينه صديقتك اليوم بيعوضك ربي بحاله اسهل وأفضل مستقبلاً

 ودائماً سوو كل شيء لوجه الله وبنيّه طيبه♥️

بالنسبه للاختبار النهائي فهو على ثلاثه أقسام : 

الاول : حالة خلع متكاملة بنفس خطوات الخلع طول الترم (٢٠ درجه) 

الثاني : اختبار شفوي من ١٠ درجات 

الثالث : الاختبار النظري النهائي من ٢٠ درجه 

قد يكون القلق الأكبر تجاه الاختبار العملي هو كيف نجد مريضه ونضمن وجودها في يوم الاختبار ،

 من هذي الناحيه اقولكم الدكاتره جداً متعاونين وطبعاً لأنها مو مسؤولية الطلاب تأخر او تخلّف المريض عن موعده 

اذكر اني بعد بحث اسبوع كامل عن مريضه ، ولأن اسمي في مقدمة القائمه ..

لما جا صباح الاختبار وتواصلت مع بنتها عشان أتأكد من حضورها

اعتذرت لي وقالت (الوالده مافيها من جا الموعد اليوم، ممكن نأجله؟) 

واختباري وحياتي ؟ ما انسى كمية الاحباط اللي أصبت فيها 😂 

لكن بفضل الله تشاركنا مريضه عندها خلع لـ٤ اسنان ، وودعت السيرجري لمدة سنه كامله ! 

بالنسبه للاختبار الشفوي ، فهو يعتمد بشكل كبير على كل معلومات السيرجري اللي سبق ودرستوها

/أدوات / طرق خلع/ ادويه / وراح تجدون ملفات من الدفع السابقه تحتوي على اسئله

وملخصات كثيره وكانت كافيه للمذاكره ✅.

عيادات السيرجري هذا الترم -ولأنها كانت الاصعب والأكثر قلقاً - تعلمت منها اشياء كثير ،

 وقابلت فيها شتّى انواع المرضى وتعلمت أساليب التعامل معهم . 

بداية العيادات راح تخافون ، ترتجف يدكم لأول عملية تخدير ، اطول حبسة نفس لما تخرجون السن من الـSocket وانتم

 تدعون الله بخروجه كامل بدون كسور ، توقف النزيف في الوقت المُقدر له ،

 ولكن مع مرور الوقت بتشوفون انفسكم صرتوا بقدرات اكبر ومهارات اعلى ،

ممكن تضطرون لاستخدام أدوات غير الملاقط لاستخراج السن ، ممكن تشهدون حالة خياطه مع الطبيب ،

وراح يكون بإمكانكم التفريق بين الآم المريض متى يكون ألمه ألم حقيقي ناتج عن قلة كمية المخدر ،

ومتى يكون فقط ألم نفسي او خوف 

واهم مهاره ، هي مهارة اتخاذ القرار 

متى مفروض اكمل عملية الخلع بنفسي إلى النهايه، ومتى مفروض أوقف واسلم الحاله للطبيب لإكمالها

لأن وببساطه قدرتي تتوقف عند هذا الحد ! 

ومع ذلك لا تخافون وحتى لو كانت الحاله صعبه وكملها مثلاً الطبيب المشرف ،

هذا لا يعني انكم غير مؤهلين او ان قدراتكم محدوده ، وتذكروا دائماً أن مصلحة المريض اللي صبّ كل ثقته فينا أولاً .

من القلب خلاصة هذا المستوى ♥️ : 

-لكل ماده في عيادات يتم توزيع قوائم بأسماء مرضى مناسبه حالاتهم لهذا المستوى الدراسي ، وطبعاً لان القائمه

لا تكفي الحاجه او قد لا تتوافق مع المتطلبات اللازمه لذلك لا تعولوا عليها بشكل كامل ، ابحثوا (وابدأوا في البحث وقت مُبكر)

 في كل مكان عن مرضى ممكن إعلانات في -قروبات الواتساب- وسائل التواصل الاجتماعي عموماً 

أهلكم ، اصدقائكم ، أقاربكم، الجيران ، عيادات الامتياز ..... 

عيادات التشخيص في معظم الأحيان قد تجدون فيها ظّالتكم، (خلع او تركيبات) فممكن تستفيدون من الطرفين 

وكذلك ممكن تفيدون غيركم من المستويات الثانيه ، حشوات تركيبات ثابته وغيرها (وطبعاً تسألوني أولاً اذا احتاج مريض 🏃🏻‍♀️😂) 

ممكن يكون الموضوع قلق للبعض ويشكل هاجس ، قد تجدون مريض مناسب ، ومناسب لمتطلباتكم وتحصلون

 على الموافقه ببدء العلاج (وهنا تشعرون بأثر برّ الوالدين عليكم )

وربما تجدونه ، ووقت العياده يرفض الطبيب المسؤول معالجته لانه ببساطه لا يناسب مستواكم

 وتصبح كل عملية البحث هباءً منثوراً !

ولكن في الاخير راح تلاقون مرضى وتكملون متطلبات وكل شي يتيسر بطريقةٍ مَّا ♥️.

-العيادات كنز ، تعلمت فيها اشياء ما تعلمتها في الكتب والمحاضرات ، كون انك يومياً او "شبه يومياً"

 تتعامل مع مرضى بكافّة الاختلافات والفروقات هذا الشي يجعل منك شخص ذا شخصيه مصقولة ،

 قادر على زراعة الثقه بينك وبين المريض من اول زياره،  لديك فن التعامل مع جميع انواع المرضى ،  

المريض الخائف الذي يُشعرك بأنه مُقدم على عملية قلب مفتوح بدلاً من خلع سن ،

المريض الذي لديه تجارب سابقه سيئه مع أطباء الاسنان ويشعر بعدم الثقه ، كثير الحركه الغير مستقر، 

 اللامبالي والمُلتزم ، سيّء الخُلق واللطيف ، الصغير ، الكبير 

الكل.. 

العيادات غير مليئة بالملل والرتابه (مثل المعامل سابقاً) في كل يوم او في كل عياده حاله و تجربه جديده ،

دهشه مختلفه ، اخطاء وتعلم ، انجاز وممكن حتى خيبه ! 

استفيدوا من كل لحظه تمرّ فيكم في العيادات 

المعلومات ، الملاحظات ،وحتى الأخطاء تعلموا منها !  

-الاختبارات النصفيه تقريباً تبدأ من الاسبوع السابع او السادس ، وخلافاً لما جرت عليه العاده بيكون عندكم 

وقت طويل جداً جداً قبل الضغط ، كافي لأنكم تلخصون محاضراتكم- لو حابّين وتناسبكم 

الطريقه طبعاً- تنهون الواجبات اللي بتنهال عليكم اول الترم ، بالتالي ترتاحون لاحقاً ويخف الضغط .

تخلصون لو قدرتوا الشغل والتقييم أول بأول والله الله بعدم المراكمه !  وعلى الاقل تكونون 

مخلصين حالتين في مادة الجراحه ، وأضعف الإيمان حاله وحده 

-تعاونوا تعاونوا تعاونوا .. لو فيه نصيحه وحده بعطيكم اياها هذا الترم بتكون انكم تتعاونون سواءً

 في المرضى ، في الشغل والتطبيق العملي ساعدوا بعض علموا بعض افيدوا بعض مافيه شي

 يضيع كل شي لاحقاً بيعود لكم بشكل او بآخر ، 

حصولكم على مرضى اكثر هذا فضل من الله، معالجتكم لكل هؤلاء المرضى لوحدكم هذا طمع!

مرضى اكثر من عدد المتطلبات لا يعني درجات أكثر 

ودائماً  "الخبره قد تأتي حتى بالملاحظة ، لا بكثرة الحالات" 

الانانيه تآكلكم زي ما تآكل النار الهشيم! 

-دائماً خلوكم حازمين مع المرضى في تحديد المواعيد ، دائما خلوكم مهنيين في تحديد المواعيد بوقت ابكر, 
يعني مو منطقي الموعد بكره وتكلم المريض اليوم الساعه ٩ مساءً ! 

نبّهوا المرضى ان تخلّفه عن الموعد اليوم -الا في حالات الظروف الصعبه- 

قد يعرضّه لاحقاً لصعوبة الحصول على موعد جديد 

(مع انها ما تصير ومع اننا احنا اللي نركض وراهم لكن نحسسهم بالمسؤوليه)

-في حالة عدم وجود مرضى او حالات في العياده ، لا تروحون وتتركون العياده إضافه الى انه 

ممكن يصير فيه عدّ للطالبات الموجودات بشكل مباغت ممكن يجي مريض فجأه تحويل من مستوى اخر ، او من عيادات الامتياز وتروح عليكم الفرصه الذهبيه .. تقدرون تجلسون تذاكرون مثلاً، تدورون على مرضى -اذكر مرتين حصلت على مريضتين بالحظ او ممكن بسبب دعوات امي - تساعدون زميلاتكم ، 

ممكن تحضرون حاله مثيره او شيء خارج عن المألوف ! 

-اعتمدوا على انفسكم في كل شي في العيادات او في المعمل ، صحيح التعاون حلو ومؤنس لكن في

 لحظةٍ مَّا بتفضلون انكم تكونون عارفين كل شي وكل خطوه عوضاً عن كونكم في مجموعه 

-جهزوا لحالاتكم من بدري ، شوفو الاشعه وملف المريضه قبل الموعد بوقت وهذا يُطبق خصوصاً 

في الجراحه لأن كل اسبوع مريض جديد ، جهزّوا العياده من بدري واضمنوا تواجد كل احتياجاتكم وقت الشغل ،

 لانه أريح نفسياً . دوّنوا الخطوات ، او رتبوها في عقلكم المهم تكونون عارفين ايش بتسوون بالضبط بالترتيب 

وكذا ما بتنتابكم نوبة التوتر والقلق وحالة الايش اسوي الحين؟ 

بالتالي ثقه اكثر مع المريض ✅

-نصيحة الدكتور فواز في يومٍ مَّا قال لي :" عاملي المريض كمريض ، لا تعاملينه كمتطلب"! 

ما أنساها وودي اعلقها في كل ركن في العيادات 

احرصوا انكم تسألوهم أكلوا؟ قبل موعد الخلع اذا مريضه كبيره في السن احرصوا على قياس

 الضغط والسكر ، حتى في حالة عدم وجودهما .. او على الاقل الضغط 

احرصوا دايماً تكونون جايبين احتياطكم من الأكل (عصير وفطيرة مثلاً) للمرضى اللي ممكن 

يجون بدون فطور ، وبكذا تكسبون وقت اكثر بدل المشواااااار الطويل لكافتيريا الجامعه 

بعد انتهاء الخلع احرصوا تقولون لها تعليمات ما بعد الخلع ، الادويه طريقة اخذها بالوقت بكل 

شي حتى لو كنتو كاتبينها في الوصفه الطبيّه 

احرصوا تسألو المرضى عن الـnext step 

انتي بتخلعين سن ولازم يكون مكانه بديل ، بعض المرضى يكونون من التشخيص الأولي يُقرر

 لهم خلع بس ما يدرون وش يسوون بعد ما يخلعون ببساطه اسألوهم (او ممكن تطّلعون على الملف 

وتشوفون خطة العلاج) لو المريض ما يعرف او مافيه بديل في خطة العلاج اقترحوا اقتراحات 

وممكن تحولوهم لمستويات اخرى . 

خلوكم إنسانيين، اسألوا عنهم بعد عملية الخلع تطمنوا على أحوالهم ابنو علاقات كويسه مع المرضى

 ينهالون عليكم أقاربهم من حيث لا تحتسبون 

-احفظوا بيانات المرضى ، صور ملفاتهم صور الاشعه ارقام الهواتف ، 

عشان وقت ما تحتاجونها خصوصاً للمرضى المستمرين معكم عدة مواعيد يكون الوصول سهل .

اخيراً ، قد أكون بالغت في وصف خفة هذا المستوى ( واتمنى لاحقاً ما تدعون عليّه) لكني في ذات 

الوقت تكلمت عن عشوائيتي فشلي وحتى عن أخطائي عشان امنع التنظير عنه واضعكم امام أن 

الأمر ممكن يصيب وممكن يخيب وكلٌ على حسب تعاملكم معه 

نصيحتي اللي بقولها دايماً في كل تدوينه، استمتعوا ! استمتعوا بكل لحظه في هذا المستوى ، 

لا تعيشون أيامكم الدراسيه على اساس فتره وبتعدي .. بتعدّي لكن هل بنحتفظ بشيء منها؟ 

اختبارات وضغط عيادات والبحث عن مرضى ، شعل معمل وتقييمات متراكمه 

لكن بتمرّ اشياء بسيطه تسعدكم بسيطه جداً مثلاً نجاح الامبرشن رقم ١٠ بعد تسع محاولات فاشله 

(او خليني اقول ٩٩ محاوله بالنسبه لي 😂!) 

المريض اللي يجي فجأه بعد اليأس من مريضتكم اللي أجلت الموعد للمره الثالثه 

أو لما تنهون علاج حاله مُعيّنه وتتفآجون بالمريضة تقولكم : يدك خفيفه ماشاء الله ♥️! 

هنا حتى الدرجات ما تبغونها♥️♥️♥️

لما تاخذون علامه شبه كامله في تقييمٍ ما أو لما تضبط الاشعه من أول مره 

لما تحسون بإحساس السن يتحرك وقت الخلع ، لما تلبس مريضتكم الطقم وتنبسط بالنتيجه ♥️♥️♥️

لما تتعلق الدراسه في الوقت المناسب😂

-ما اذكر اني فرحت بتعليق دراسه في حياتي مثل فرحتي بالتعليقات الكثيره ف الفصل الدراسي

 الثاني-

اذكر حفلة الشواء اللي أقامتها كليتنا كانت من اكثر الاشياء اللي غيرنا جوّ فيها وجددت طاقتنا ❤️

نصيحتي الثانيه اللي أكررها دائماً على مسامعكم أو بين أيديكم، لا تسمعون كلام احد !

 ابداً ابداً ! راح يكون عندكم المُثبطين اللي يقولون هذا المستوى خدعه وفي آخره بتتعبون،

صدقوني جهودكم هي اللي بتصنع منكم أشخاص ناجحين ! لا المكان ولا البيئه ولا حتى تجارب الاخرين 
بتصنعكم .

أتمنى لكم ترم موفق مليء بالدهشة والمرضى الكثيرين الطيبين .

متواجده دائما على تويتر :@iathiir

دُمتم سالمين 💕.